मुख्यमंत्री एकनाथ शिंदे यांचे गौरवोद्गार
महिला दिनानिमित्त विधानभवन प्रांगणात महिला पोलीस अधिकारी, कर्मचाऱ्यांचा सन्मान
मुंबई :आज सगळ्या क्षेत्रात महिला आघाडीवर आहेत. अनेक आव्हानांचा सामना करत महिला पोलीस कर्मचारी कामाच्या ठिकाणी चोख कर्तव्य बजावत असतात. महिला पोलीस कर्मचाऱ्यांसाठी ज्या आवश्यक सोयीसुविधा आहेत त्या प्राधान्याने पुर्ण केल्या जातील असे मुख्यमंत्री एकनाथ शिंदे म्हणाले. जागतिक महिला दिनानिमित्त विधीमंडळातील प्रांगणात काल महिला पोलीसांच्या सन्मानार्थ आयोजित कार्यक्रमात ते बोलत होते.
अर्थसंकल्पात देखील राज्यातील महिलांसाठी विशेष तरतूद करण्यात येणार असून महिला पोलीसांच्या सोयीसाठी आरोग्य विभागाच्या माध्यमातून सर्व पोलीस स्थानकात हिरकणी कक्ष सुरू करण्यात येतील असेही मुख्यमंत्र्यांनी सांगितले. उपमुख्यमंत्री तथा गृहमंत्री श्री. फडणवीस यांनीही महिला पोलीस अधिकारी कर्मचारी यांच्या कर्तृत्वाबाबत गौरवोद्गार काढले.
यावेळी उपस्थित महिला पोलीस अधिकारी यांचा मुख्यमंत्री श्री. शिंदे व उपमुख्यमंत्री श्री. फडणवीस यांच्या हस्ते भेटवस्तू व पुष्पगुच्छ देऊन सन्मान करण्यात आला.
