कोल्हापूर : जुन्या-नव्या अजरामर हिंदी गीतांच्या सुरेल वर्षावाने आणि मंत्रमुग्ध करणाऱ्या सुरावटींनी शाहू स्मृती भवनातील वातावरण पुरते संगीतमय झाले. निमित्त होते 'साउंड ऑफ म्युझिक ग्रुप'तर्फे आयोजित 'साज ए दिल छेड दे - पर्व ५' या बहारदार कराओके संगीत सोहळ्याचे! रविवार, ४ ऑक्टोबर रोजी दसरा चौक येथील शाहू स्मारक भवनात पार पडलेल्या या कार्यक्रमाने कोल्हापूरच्या रसिक प्रेक्षकांची मने जिंकली.
कार्यक्रमाचा प्रारंभ उपस्थित सर्व प्रमुख मान्यवरांच्या हस्ते पारंपरिक दीपप्रज्वलनाने झाला. या संकल्पनेचे शिल्पकार विजयकुमार पवार होते, तर प्रसिद्ध गायिका अंजली दुर्गाई यांच्या सुरेख आयोजनातून हा संगीताचा नजराणा साकारला गेला. प्रसिद्ध निवेदक महेंद्र कुलकर्णी यांनी आपल्या ओघवत्या आणि अभ्यासपूर्ण शैलीत प्रत्येक गाण्याचा इतिहास आणि त्यामागील भावार्थ उलगडून सांगत निवेदनातून रसिक प्रेक्षकांना खिळवून ठेवले.
अजरामर गीतांचा सुरेल प्रवास
संगीताची सुरुवात सन्मती टिक्के आणि जावेद नाईकवडे यांनी सादर केलेल्या 'साज ए दिल छेड दे' या शीर्षक गीताने झाली. त्यानंतर सुरांच्या या मैफिलीत एकेक गाणे रसिकांच्या थेट मनाचा ठाव घेत गेले. 'जनम जनम का साथ है' या गाण्यातून विजयकुमार पवार यांनी जन्मोजन्मीच्या नात्याची रेशीमगाठ स्वरांमध्ये गुंफली. 'गोरे रंग पे ना इतना गुमान कर' – अंजली दुर्गाई आणि प्रकाश पत्की यांच्या या रोमँटिक युगुलगीताला प्रेक्षकांनी टाळ्यांच्या कडकडाटात भरभरून दाद दिली. 'कोयल बोली दुनिया डोली' व 'तेरे मेरे मिलन की ये रैना' – राधिका ठाणेकर आणि विजयकुमार पवार यांनी या अजरामर गीतांतून जुन्या काळातील प्रेमाची निरागसता पुन्हा जिवंत केली. 'तेरे चेहरे से नजर नहीं हटती' – नविता नाईक आणि रवि धुमाळ यांच्या सुरेल सादरीकरणाने वातावरणात हळुवार रोमँटिकता पसरवली. 'ये समा समा है ये प्यार का' – गीता अतितकर यांच्या सुमधुर आवाजाने संध्याकाळ अधिक रंगतदार केली. 'चांद आहे भरेगा' – झाकीर स्वार यांनी आपल्या खास शैलीत हे गाणे सादर करत रसिकांना भुरळ घातली. 'देखा एक ख्वाब तो ये सिलसिले हुए' – शर्मिला मोरे आणि सुधीर नाईक यांच्या या सदाबहार गीताने कार्यक्रमाचा मुख्य भाग गाठत सोहळ्याला एक वेगळीच उंची मिळवून दिली.
या सुरांच्या सोहळ्याला माजी महापौर व महाराष्ट्र राज्य मंडप असोसिएशनचे अध्यक्ष सागर चव्हाण, माजी महापौर व स्थायी समिती चेअरमन महेश सावंत, नगरसेविका जयश्री चव्हाण, आंबेवाडी ग्रामपंचायत सदस्य व पंचगंगा विकास सेवाचे चेअरमन विक्रम अतितकर, निवृत्त शिक्षक मदन संकपाळकर, सचिन चव्हाण आणि सुप्रसिद्ध गायक दिनेश माळी आदी उपस्थित होते.
उत्कृष्ट नियोजन आणि रसिकांची दाद
साउंड ऑफ म्युझिकच्या ॲडमिन अंजली दुर्गाई यांनी कलाकारांकडून करून घेतलेली संगीताची तयारी आणि उत्तम नियोजनाची चुणूक प्रत्येक सादरीकरणात दिसून आली. प्रत्येक गाण्यानंतर प्रेक्षकांकडून मिळणाऱ्या टाळ्यांच्या कडकडाटाने कलाकारांचा उत्साह द्विगुणित केला. कोल्हापूरच्या संगीतप्रेमींनी या यशस्वी आयोजनाबद्दल मनापासून समाधान व्यक्त केले.
.jpeg)
