गडहिंग्लजमध्ये भर चौकात पोलिसांची अनोखी कारवाई
मोठ्या आवाजाचे जप्त केलेले सायलेन्सर केले नष्ट
राज्यातील पहिलीच अनोख्या पद्धतीची कारवाई
गडहिंग्लज (प्रतिनिधी) : दुचाकीचे मूळ सायलेन्सर बदलून कर्णकर्कश आवाज काढणारे बसविण्यात आलेले बेकायदेशीर सायलेन्सर पोलिसांनी जप्त करत चक्क दसरा चौकात त्यावर रोड रोलर फिरवून ते नष्ट करण्यात आले. शहराला शिस्त लावण्यासाठी पोलिसांनी केलेल्या या अनोख्या कारवाईचे नागरिकांनी स्वागत केल्याचे दिसून आले.
गडहिंग्लज पोलीस ठाण्याकडे गेले तीन महिने झाले परिविक्षाधीन पोलीस अधीक्षक हर्षवर्धन बी.जे हे रुजू झाल्यानंतर शहरातील अतिक्रमण, अवैध धंद्यावर बेधडकपणे कारवाई, शहरातील वाहतुकीला शिस्त लावण्यासाठी प्रयत्न केले आहेत. याबरोबरच विना कागदपत्रे, विना हेल्मेट दुचाकी चालविणे, लायसन्स नसणे, ट्रिपल सीट, मोठे आवाज करणारे सायलेन्सर बसविणाऱ्या दुचाकीस्वारांवर कारवाईचा धडाका सुरू केला आहे. या माध्यमातून त्यांनी शहराला शिस्त लावण्याचा केलेला प्रयत्न निश्चितच कौतुकास्पद आहे.
दरम्यान, दुचाकींची सायलेन्सर बदलून मोठ्या आवाजाची बेकायदेशीररित्या बसविण्यात आलेली जवळपास १०१ सायलेन्सर पोलिसांनी जप्त केली होती. सदर सायलेन्सर आज सायंकाळी दसरा चौकात रोड रोलरच्या साह्याने नष्ट करण्यात आली. पोलिसांच्या या अनोख्या कारवाईची शहरात चर्चा झाली. गडहिंग्लज पोलिसांनी अशा पद्धतीने केलेली ही कारवाई बहुतेक पहिलीच असल्याचे बोलले जात आहे. शहराला शिस्त लावण्यासाठी पोलिसांच्या या अनोख्या कारवाईचे नागरिकांनी देखील स्वागत केले. यावेळी परिविक्षाधिन सहाय्यक पोलीस अधीक्षक हर्षवर्धन बी जे, पोलीस उपअधीक्षक रामदास इंगवले उपस्थित होते.
व्हिडिओ येथे पहा 👇
