गडहिंग्लज ( प्रतिनिधी): आगामी गणेशोत्सवाच्या पार्श्वभूमीवर, गटशिक्षणाधिकारी यांच्या निर्देशानुसार पी एम श्री केंद्रशाळा भडगाव येथे पर्यावरणपूरक गणेशोत्सव साजरा करण्याबाबत भव्य व शिस्तबद्ध जनजागृती प्रभातफेरीचे यशस्वी आयोजन करण्यात आले.
सकाळी ८:०० वाजता शाळेच्या प्रांगणातून या प्रभातफेरीस सुरुवात झाली. या उपक्रमात शाळेतील सर्व विद्यार्थी आणि शिक्षक मोठ्या उत्साहाने सहभागी झाले होते.
घोषवाक्ये आणि पोस्टर्सने वेधले लक्ष
विद्यार्थ्यांनी स्वहस्ते तयार केलेले रंगीबेरंगी पोस्टर्स आणि बॅनर हा या प्रभातफेरीचा मुख्य आकर्षणबिंदू ठरला. "इको-फ्रेंडली गणेशा, पर्यावरणाचा मानकरी", "माती करा, माती वाचवा", आणि "शाडूची मूर्ती वापरा, पर्यावरण वाचवा" अशा विविध पर्यावरणपूरक संदेश देणाऱ्या घोषवाक्यांनी आणि जनजागृतीपर गीतांनी संपूर्ण भडगाव परिसर दुमदुमून गेला.
शाळेपासून सुरू झालेली ही प्रभातफेरी गावातील प्रमुख रस्ते व चौकातून काढण्यात आली. विद्यार्थ्यांनी दिलेल्या घोषणा आणि प्रभावी फलकांमुळे स्थानिक नागरिकांमध्ये शाडूच्या मूर्तीचा वापर आणि प्लास्टिकमुक्तीबाबत सकारात्मक संदेश पोहोचण्यास मोठी मदत झाली.
कोणत्याही अडथळ्याविना अत्यंत शिस्तबद्ध वातावरणात हा उपक्रम पार पडला. या उपक्रमाच्या यशस्वीतेसाठी केंद्र मुख्याध्यापक *राजेंद्र मांडेकर, शाळेतील सर्व शिक्षकवृंद आणि पी एम श्री केंद्रशाळा भडगावच्या शाळा व्यवस्थापन समितीच्या सर्व सदस्यांनी विशेष परिश्रम घेतले. भडगाव ग्रामस्थांकडून शाळेच्या या स्तुत्य उपक्रमाचे सर्वत्र कौतुक होत आहे.
.jpeg)
